Бесік жырын айтпайтын халық жоқ. Өйткені, бұл жырда әр ұлттың дәстүрлі мәдениетінің, ежелгі наным-сенімінің, дүниетанымының көрінісі жатыр. Қазақ халқы да бесік жырын тәрбиенің кәусар бұлағы деп таниды. Сәби тәрбиесі мен мінез-құлқын қалыптастыруда бесік жырының орны бөлек. Ол баланың көкірек көзін ашады. Жан-жүйесін тербеп, көңіл-күйін көтереді. Жалпы, әже мен ананың әлдиі сәбидің алғашқы өнер мектебі.

Қазір бесіктегі бөбекке бесік жырын айту ұмытылып барады. Осы олқылықтың орнын толтыру мақсатында Төретам кенттік клуб үйі «Бесік жыры – басты жыр» тақырыбында жас аналар фестивалін өткізді. Діттегені – жастарға бесік жырының маңыздылығын түсіндіріп, қазақы салт-дәстүрімізді жаңғырту.

Аталған іс-шарада Төретам кенттік клуб үйінің өнерпаздары шағын сахналық қойылым көрсетіп, отбасылық жылулық пен балалы үйдің бақытты сәтін айқын көрсетті. Фестивальге жас аналар қатысып, бесік жырын жырлап, ақ жаулықты аналар Дина Тілеуова мен Ахметкүл Аралбаева «бесікке салу» дәстүрін көрсетіп, жөн-жоралғысы мен ырымдарын жасады. Жанқожа батыр атындағы №269 орта мектептің Ләззат Жұмабаева бастаған жас қыз-келіншектер бесікке салу тойына құтты болсын айта келіп, одан әрі қыздыра түсті.

Мәдени іс-шараға Төретам кент әкімінің орынбасары Сәрсенкүл Есқалиева қатысып, өнерпаздарға диплом мен сыйлықтар табыстады. Фестивальге кент кәсіпкерлері демеушілік жасап, іс-шара соңында барша аналарға ақ орамал жауып, өз ризашылықтарын жеткізді.