Энергетика саласындағы ұтымды қадам

Қазақстанның энергетикалық әлеуеті айтарлықтай болғанымен, қазіргі қолданыстағы энергия көздерінің шектеулігі ұзақмерзімді перспективада тұрақтылықты қамтамасыз ете алмайды. Көмір, мұнай және газ сияқты дәстүрлі энергия көздері экологиялық тұрғыдан тиімсіз және қорлар уақыт өте келе сарқылады. Сондықтан АЭС салу – энергетика саласындағы ең ұтымды шешімдердің бірі болмақ. Атом энергиясы, оның тиімділігі мен экологиялық қауіпсіздігі тұрғысынан алғанда, энергия өндірісінің тұрақты және сенімді көзі бола алады.

АЭС құрылысы елдің экономикалық дамуына жаңа серпін беріп, энергетикалық қауіпсіздікті қамтамасыз етіп қана қоймай, жоғары технологиялық салаларға инвестиция тартуға мүмкіндік береді. Бұл – инновациялық жобаларды дамыту, жаңа жұмыс орындарын ашу және ғылыми-техникалық әлеуетті арттыру бағытындағы маңызды қадам. Қазақстан өзінің уран қоры жағынан әлемде көшбасшылардың бірі болып табылады, сол себепті атом энергиясын дамыту елдің экспорттық мүмкіндіктерін кеңейтіп, экономикалық өсімге оң әсер етеді.

Атом энергетикасы экологиялық тұрғыдан да тиімді шешім болып саналады. Климаттық өзгерістер мен қоршаған ортаға зиянды шығарындыларды азайту – халықаралық қауымдастық алдында тұрған басты мәселе. Осы ретте, АЭС парниктік газдардың шығарылуын азайтып, экологиялық қауіпсіздік пен тұрақтылықты қамтамасыз етеді.

Сонымен қатар, Қазақстанның халықаралық аренадағы беделін нығайтуда бейбіт мақсаттағы атом энергетикасын дамыту маңызды рөл атқарады. Ел халықаралық келісімдер мен ядролық қауіпсіздік талаптарын сақтай отырып, жаһандық энергетикалық қауіпсіздікке өз үлесін қоса алады. АЭС салу еліміздің энергетикалық тәуелсіздігін арттырып қана қоймай, оны халықаралық деңгейде сенімді серіктес ретінде таныта түседі деген ойдамын.