Жылылық – жүректен
Жаңа оқу жылының қарсаңында аудандық Отбасын қолдау орталығында «Мектепке жол» акциясы өтті. Іс-шара аудандық жұмыспен қамту және әлеуметтік бағдарламалар бөлімінің мемлекеттік тапсырысы аясында «Ораз ахун» қоғамдық қорының ұйымдастыруымен жүзеге асты.
Акция барысында әлеуметтік тұрғыдан қолдауды қажет ететін, соның ішінде пробация есебіндегі азаматтардың 15 баласына мектепке қажетті құрал-жабдықтар берілді. Балаларға мектеп формалары, оқу құралдары, сөмкелер таратылды. Бұл қолдау жаңа оқу жылына дайындықты қамтамасыз етуге бағытталды.
Акцияның жоғары деңгейде ұйымдастырылуына аудандық және Байқоңыр қаласының пробация қызметінің мамандары үлкен қолдау көрсетті. Олар акцияға атсалысып, балаларға қажетті құрал-жабдықтардың жеткізілуіне септігін тигізді.
Іс-шарада «Ораз ахун» қоғамдық қорының төрағасы Ақтолқын Алтынбайқызы сөз сөйлеп, қолдау көрсеткен азаматтарға алғыс білдірді. Мұндай игі шаралар балалардың білім алу мүмкіндігін арттырып, қоғамның әлеуметтік бірлігін нығайтуға үлес қосатынын атап өтті.
«ҚТ» ақпарат
