«Алтын белгі» үміткерлеріне артылар үміт көп
Он бір жыл мектепте үздік оқып, ата-ана мен ұстаздарының қуанышы болған мектеп бітіруші түлектер – ауданымыздың ғана емес, еліміздің мақтанышы.
Олардың болашағынан ел-жұрты үлкен үміт күтеді. Биылғы жылы аудан бойынша барлығы 15218 оқушы білім алса, оның 685-і жалпы білім беретін орта мектепті бітіреді. Осы түлектердің 94,7%-ы, яғни 649 бітіруші Ұлттық бірыңғай тестілеуге қатысады деп күтілуде. Сондайақ, білім беру ұйымдары бойынша биылғы жылдың ерекшелігі 54 мектеп бітіруші «Алтын белгіге», 67 бітіруші «Үздік аттестатқа» үміткер ретінде ұсынылды.
Айта кетейік, ауданда №121 мектептің бітіруші түлегі Мақсат Қуанышбек ұлттық бірыңғай тестілеудің алғашқы нәтижесінен-ақ ұстаздарының берген білімі мен тыңғылықты дайындығының арқасында 140 балдың 136 ұпайын жинап, аудан мерейін асқақтатты. Ол өзі қалаған Алматы қаласындағы «Алматы КБТУ ҚАЗАҚ Британ» университетіне «Ақпараттық технология» мамандығы бойынша түсу мүмкіндігіне ие болып отыр.
Сәкен МҰРАТОВ,
аудандық білім бөлімінің әдіскері
