1000 көшбасшы жобасының жеңімпаздары
Қазақстан Республикасының Президенті Қасым-Жомарт Тоқаевтың VIII сайланған Парламенттің бірінші сессиясының ашылуында, сондай-ақ ҚР Үкіметінің 2023 жылы 28 наурыздағы №249 қаулысымен бекітілген мектепке дейінгі, орта, техникалық және кәсіптік білім беруді дамытудың 2023-2029 жылдарға арналған тұжырымдамасын іске асыру жөніндегі іс-қимыл жоспары аясында айтылған кадр резервін қалыптастыру қажеттілігі туралы тапсырмасын орындау үшін Оқу-ағарту министрлігі «Білім берудегі өзгерістің 1000 көшбасшысы» бағдарламасын іске асыруды жалғастыруда.
Жоба өткен жылы пилоттық режимде іске асырылды. Жобаның бастапқы кезеңінде барлығы 8068 өтінім берілген. Үміткерлер құзыреттілікті бағалау, үш деңгейлі оқыту, еліміздің жетекші озық мектептерінде тағылымдамадан өту, қорытынды бағалау және министрлік жанындағы комиссиямен әңгімелесуден өтті. Соның аясында Қазақстан Республикасы Оқу-ағарту министрінің 2023 жылы 28 желтоқсандағы №396 бұйрығына сәйкес 208 үміткер республикалық кадр резервіне алынды. Осыған орай, Астанада «Білім берудегі өзгерістің 1000 көшбасшысы» жобасы бойынша Оқу-ағарту министрі Ғани Бейсембаевтың қатысуымен іріктеуден сәтті өткен үміткерлерге сертификат тапсыру рәсімі өтті.
Салтанатты іс-шараға ауданымыздан №121 орта мектебі директорының оқу ісі жөніндегі орынбасары Сымбат Ерманова мен аудандық оқушылар үйі директорының оқутәрбие ісі жөніндегі орынбасары Құралай Манасова қатысып, сертификатқа ие болды. Барлық бес кезеңнің қорытындысы бойынша оқ бойы озық шыққан жоба түлектері нағыз көшбасшылар ретінде еліміздегі білім беру жүйесінің сапасын арттыруға үлес қосады деп сенім білдіреміз.
«Қт» ақпарат
