Жеңімпаз атанды

Жыл аяқталуға жақын. Оны қорытындылау үшін жыл сайын үздіктерді анықтау дәстүрге айналған. Биылда бұзылған жоқ. Ауданымызда да әр жыл сайын үздіктердің қарасы қалыңдап марапат төрінен көрініп жүр.

Жақында ҚР Мәдениет және спорт министрлігінің ұйымдастыруымен өткен «Рухани қазына – 2023» мәдениет ұйымдары мен мәдениет ұйымдары қызметкерлерінің республикалық фестивалі өткен еді. Биыл оған еліміздің түкпір-түкпіріндегі музей, кітапхана мен мәдени ойын-сауық ошақтарының 200-ге жуық қызметкер қатысқан. Нәтижесінде 29 аталым бойынша үздіктер анықталды. Осы тізімге аудандық тарихи-өлкетану музейінің ғылыми қызметкері Әзірбек Бақтыбаев еніп, «Аудандық маңызы бар музейдің үздік қызметкері» номинациясына лайық деп танылды. Арнайы дипломмен қоса 500 000 мың теңге қаржылай сыйлықты да жеңіп алды.

Әзірбек Ілиясбекұлы тарихи жәдігерлерді көздің қарашығындай сақтап, ауданның мәдени мұрасын қорғау жолында аянбай еңбек етіп жүрген қарапайым қызметкер. Археологтармен бірге талай тарихты ішіне бүккен көне қалаларды ашу жұмыстарында аянбай еңбек етеді. Білікті маманның бұл еңбегінің жемісі биыл еленіп жатыр. Дана халқымызда «Ел мерейі – ер мерейі» деген сөзі бар. Өзінің туып-өскен топырағының құндылығын қалың көпшілікке таныстырып жүрген жан өз әсерін бізбен де бөлісті.

– Қармақшы киелі Қорқыт бабаның елі. Тарихи ескерткіштерге де толы жер. Сондай-ақ жыраулық өнердің де мекені. Музей – адамның рухани құндылықтарын дамытушы әрі бүгінгі өмірге тарих көзімен қарайтын орын, сан ғасырдың жәдігерлері сақталатын мәдени орталық. Ондағы негізгі қызметтердің бірі – музей залдарына экскурсия жүргізу. Экскурсия ғылыми-танымдық білім беру, мәдени ағарту мақсаттарда белгілі бір орындарға жүргізілетін сапар. Мұндағы қызметкерлер экскурсия барысында танымды әрі тағылымды әңгімесімен әрбір экспонатқа жан бітіреді, сөйлете біледі, сырын ашады. Мен өз жұмысымды жақсы көремін. Туған жердің тұнып тұрған көне жәдігерлері мен құндылықтарын көпшілік алдында таныстырып, насихаттау мен үшін – үлкен мақтаныш. Осының барлығын байқау барысында көрсетуге тырыстым. Бұл біраз әріптестерімнен озық болып, жеңімпаздардың қатарынан табылғаныма қуаныштымын. Жан-жақтан мәдениет саласының үздіктері мен кіл жүйріктері қатысты. Сондықтан да бір-бірімізбен үлкен тәжірибе алмастық деген ойдамын, – дейді жеңімпаз.