Құрмет пен тағзым

qarmaqshy-tany.kz 29 тамыз - Халықаралық ядролық сынақтарға қарсы іс-қимыл күніне орай алапат күштің зардабын шегіп дүниеден озған азаматтардың рухына құран бағышталып, ескерткішке гүл шоқтары қойылды.

Өткен ғасырдағы адамзат баласының басынан кешкен бұл зұлмат – ұлттың болашағына орасан зор әсерін тигізді. Атаулы күнді атап өту шарасына қатысқан аудан әкімінің орынбасары Самат Қыдырбекұлы:

"Семей ядролық сынағы халқымыздың орасан зор зардап шеккен оқиғасы болып тарихта таңбаланды. Қаралы күндерді ешкім, ешқашан ұмытпақ емес. Оның әсерін халқымыз әлі күнге дейін тартуда. Еліміз ядролық қарудан бірінші болып бас тартқан елдердің қатарында болды. Бұл қадамды әлем елдері түгелдей қолдады. Семей ядролық апатын жоюда жігерлік танытқан барша жерлестеріміздің ерлігіне тағзым ету бүгінгі біздің борышымыз",- деді.

Мұнан әрі шара Семей полигонында әскери қызметте болған, сол бір ауыр күндердің куәгерлеріне аудан әкімінің "Алғыс" хаттарын табыстаумен жалғасып, ядролық полигон зардабынан қаза болған азаматтардың отбасыларына сыйлықтар табыстады.

Одан соң, аудандық мәслихаттың және «AMANAT» партиясы Қармақшы аудандық филиалының төрағасы Әділ Үсенұлы, аудандық ардагерлер кеңесінің төрағасы Асқар Ермағанбетұлы ізгі лебіздерін білдіріп, бірқатар ардагерлерді марапаттады.

Жиын соңында Қармақшы аудандық «Невада-Семей» ардагерлері кеңесінің төрағасы Болат Сағымбаев сөз алып, ардагерлер атынан ризашылықтарын жеткізді.

Қармақшы ауданы әкімінің баспасөз қызметі