Шарада осыған дейін бір айлық курстан өткен 42 үміткердің жобасын тыңдауға «Атамекен» ҰКП аудандық филиал директоры А.Шоқбаров, «Ауыл шаруашылығын қаржылай қолдау қоры» АҚ өкілі С.Сәденов, аудандық жұмыспен қамту орталығының директоры Д.Ахметовтер қатысты. Онда елді мекендерге қажетті қызмет көрсету нысандары мен мал шаруашылығымен айналысамын дейтіндер басым.

– Бұл облыстық деңгейдегі қорғауға дейінгі жұмыстар. Аудандағы әрбір кәсіпкер боламын деген азаматтың қолтығынан демеп, жобаларының кем-кетігін түзеп, облыстық қорғауға жөнелтеміз. Аймақ басшысы Қ.Көшербаевтың сөзімен айтсақ, халықтың қолын аузына жеткізу бағытындағы жұмыстар бұл. Әрбір жоба ұсынушы өз идеясын жүзеге асыратын аумақтағы халық саны, көлік саны тәрізді мәселелерді басты назарға алу керек. Қысқасы, жоба тиянақтылықты қажет етеді, – деді «Атамекен» ҰКП аудандық филиал директоры А.Шоқбаров.

Бүгінгі 42 үміткердің қай-қайсысы да өз жобасынан үмітті. Демек, олардың арасында елге сапалы қызмет көрсетіп, жұртшылықты тәнті етер тірліктің көзін табатындар да болары анық.