Қармақшы ауданы әкімдігінде комиссия отырысы өтті
qarmaqshy-tany.kz Қармақшы ауданы әкімінің орынбасары Жұлдызхан Байназарұлының төрағалығымен аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті. Отырысқа комиссия мүшелері, құқық қорғау органдарының басшылары қатысты.
Комиссия отырысының күн тәртібіне сәйкес «Балалар қауіпсіздігі мәселелері. Демалыс кезеңінде балалар арасында төтенше жағдайлардың алдын алу, болдырмау шаралары туралы» Қармақшы аудандық төтенше жағдайлар бөлімінің аға инженері Қ.Далдиевтің, «Балалар мен жасөспірімдердің қаңғыбастыққа салынуының алдын алу, жазғы демалыстың ұйымдастырылуы, қауіпсіздік мәселесі туралы» Аудандық білім бөлімінің әдіскері А.Тоқшылықованың хабарламалары тыңдалды.
Сонымен бірге комиссия отырысында Қармақшы аграрлық техникалық колледжінің студенттері тарапынан жасалған құқық бұзушылықтар мен Жосалы кентінде автокөлік жүргізіп ұсталған кәмелетке толмағандар туралы мәселелер қаралды.
Күн тәртібінде қаралған мәселелерге орай комиссия мүшелері ұсыныс-пікірлерін ортаға салса, комиссия төрағасы кәмелетке толмағандар арасындағы құқық бұзушылықтың орын алуына жол берген жауапты қызметкерлерді қатаң сынға алды.
Сондай-ақ, тиісті сала басшыларына профилактикалық жұмыстарды күшейтуді және жазғы демалыс мерзімінде оқушыларының қауіпсіздігін қамтамасыз ету бағытында олардың ата – аналарымен бірігіп тиісті шараларды қабылдауды тапсырды.
