Нық тапсырма, мығым жоспар

qarmaqshy-tany.kz Жақында облыс әкімінің орынбасары Балмейір Сансызбайұлы өзінің іс-қимыл бағдарламасы аясында ауданға арнайы жұмыс сапарымен келіп, тыныстіршілігіне қанықты.

Б.Сансызбайұлының ауданымызға жасаған жұмыс сапарында аудан әкімі Жандос Еркінбек бастап жүріп, аудандағы бірқатар әлеуметтік нысандардың жұмыс барысы, бүгінгі жай-күйімен таныстырды.

Алдымен сапарын Қызылтам стансасында бастаған облыс әкімінің орынбасары елді мекеннің кіреберісіндегі аудандық маңызы бар автомобиль жолының жай-күйін көрді. Аудан басшысының осы елді мекен бойынша атқарып жатқан жұмыстарын саралап, мамандардың ой-пікірін зерделеді.

Сондай-ақ, ол «Жосалы-Жалағаш» автомобиль жолы бойындағы су деңгейінің күрт көтерілу әсерінен су шайып кеткен учаскелерінің жай-күйіне көңіл бөлді.

Одан әрі Балмейір Сансызбайұлы Жосалы кенті тұрғындарының көптен көкейін толғандырған теміржол көпірін салу мәселесін талқыласа, содан кейін ел игілігіне пайдалануға берілгелі тұрған денешынықтыру-сауықтыру кешенінің құрылыс жұмысын, №284 мамандандырылған мектеп-лицей интернатына кіреберіс автомобиль жолын салу мәселесін пысықтады.

Облыс әкімінің орынбасары ауданда болған жұмыс сапарында өзі көріп, байқаған құрылыс жұмыстары мен өңір экономикасын нығайту, тұрғындар әлеуетін арттыру мақсатына арналған түрлі мемлекеттік бағдарламаларды орындау бойынша тиісті сала басшыларына нақты тапсырмалар берді.