«Қазақ тілі – ұлт болашағы»

qarmaqshy-tany.kz Бүгін аудандық мәдениет және спорт бөлімі, халықаралық "Қазақ тілі қоғамы" аудандық филиалы, облыстық Тілдерді Оқыту Орталығының аудандағы мемлекеттік тіл оқытушысының бірлесуімен кент кітапханасында «Қазақ тілі – ұлт болашағы» тақырыбында дөңгелек үстел отырысы өтті.
Жиналған қонақтар ұлттық үлгімен безендірілген бөлмеде дастарқан үстінде дидарласып, көктемнің алғашқы күнімен тұспа-тұс келетін Алғыс айту мерекесінің маңызы жайлы әңгімелесті. Қармақшы ауданының Құрметті азаматы Әбдірахман Құлдүйсенов пен аудандық ардагерлер кеңесінің төрағасы Асқар Мереков ақ тілегін ақтарып, бата берді. Белсенді жастар Айдынбек Іскендіров пен Гүлжанат Дүзенова тіл туралы өлең оқыды.
Бұдан соң оқу залында дөңгелек үстел отырысы жалғасты. Отырысты "Қазақ тілі қоғамы" аудандық филиалының төрайымы Гүлжауһар Раева жүргізіп отырды. Аудандық мәдениет және спорт бөлімінің басшысы Дәурен Ержанов сөз алып, тіл мәртебесін көтеру жолында талмай еңбектеніп жүрген тіл жанашырларына алғысын білдірді. «ХХІ ғасырда шешендік өнер қажет пе?», «Ұлттық киім кию руханиятты жаңғырта ма?», «Ұлттық мінезімізден ажырап қалған жоқпыз ба?», «Ата-ананың перзент алдындағы борышын білесіз бе?» атты сұрақтар талқыға түсті. Қоғам белсенділері Шегебай Құндақбаев, Ерболат Ұзақбаев, Күлшара Қаниева, Тәжігүл Әбенова, Сәрсенкүл Райымбаева, Әмина Кетебаева, Гүлжанат Дүзеновалар ойларын ортаға салды.
Көктемнің алдындағы келелі кездесу, ондағы қаузалған тақырыптар көңілден шығып, көпке ой саларлықтай деңгейде болды.