Өкінішке орай, мейірімділік пен қайырымдылық сынды қасиеттер барлық адамға тән емес. Мейірімді, бауырмал, көмекке дайын тұратын абзал адамдар – кез келген қоғамның негізгі тірегі. Ал сауабы мол іске атсалысу – әрбір адамның азаматтық парызы. Жуырда Дүниежүзілік мүгедектер күніне орай, «Аңсаған» мүмкіндігі шектеулі балалар қоғамдық бірлестігінде мейірімге толы іс-шара ұйымдастырылды. Оған қырыққа жуық бала мен ата-ана қатысты. Игі іс-шараға үнемі аудандағы қайырымдылық істердің басы-қасында ұйытқы болып жүретін «Адина» дүкенінің иесі Нағима Тоқсанбаева, «Дәметкен ана» балаларды оңалту орталығының құрылтайшысы Дина Исмайлова, «Нұр пати» той орталығының аниматорлары, «Демеу» еріктілер тобы демеушілік жасады. Бірі – балаларға қажетті киім-кешекті сыйға тартса, енді бірі – ерекше балаларға керемет көңіл-күй сыйлады.

«Жанашырлыққа – жан риза» дегендей, өздеріне бөлінген көңіл мен демеуге ата-аналар алғыстарын жаудырды. Бала көзінен қуаныш отын көру – әрбір ата-ана үшін үлкен бақыт. Осындай бақытқа себепші болған демеушілер сауабы мол іске атсалысты. Адамдар бір-біріне осындай қайырымдылық, мейірімділік таныту арқылы жақсылық жасайды. Қамқорлықты қажет ететін жандарға қолұшын беру арқылы адам баласы жақсылыққа қадам бастайды. Жақсылық жасау – имандылықтың, тәрбиеліктің, парасаттылықтың айқын көрінісі. Ертеңге талпыныс, болашаққа бағдар, игі іске ұмтылыс – адамзатқа тән құбылыс. Ендеше, асыл арманына қол созғандарға сүйеніш болып, қолымыздан келген көмегімізді аямайық.