Ерекше жандарға құрмет көрсетілді
Ауданда Халықаралық мүгедектер күніне орай «Көңіл шуағы» атты мерекелік іс-шара өтті.
Іс-шараға аудан әкімі Қайрат Ырзақұлұлы, аудандық мәслихат хатшысы Әділ Үсенұлы, ардагерлер кеңесі, саяси партия, ҮЕҰ, БАҚ, діни бірлестік өкілдері мен мүмкіндігі шектеулі азаматтар және әлеуметтік сала қызметкерлері қатысты.
Тағылымды іс-шараға аудан басшысы Қ.Нұртай арнайы келіп, жиналған жұртшылықты мерекемен құттықтады. Сондай-ақ, ерекше жандарға қамқор болып, белсенді жұмыс жасап жүрген қоғамдық ұйым жетекшілері мен әлеуметтік сала қызметкерлеріне ризашылығын білдіріп, осы салада табысты еңбек етіп жүрген бірқатар қызметкерлерді марапаттады.
Айтулы іс-шара аясында аудандағы мүмкіндігі шектеулі 10 азаматқа бағалы сыйлықтар табысталса, «Халық» қайырымдылық қорынан мүмкіндігі шектеулі 150 азаматқа азық-түлік себеті берілді.
Бүгінде ауданымызда мүмкіндігі шектеулі жандарға қолдау көрсету бағытында «Аңсаған» мүмкіндігі шектеулі балалар қоғамдық бірлестігі, «Дәметкен Ана» оңалту және әлеуметтік бейімдеу орталығы, «Қазақ соқырлар қоғамы» қоғамдық бірлестігінің Жосалы корпоративтік қоры, Байқоңыр қаласы «Қорған» мүгедектер қоғамдық бірлестігі, «Альтаир-Бөбек» қоғамдық қоры, Қазақ соқырлар қоғамының «Бастауыш» ұйымы нәтижелі жұмыс жасап келеді.
Іс-шара соңында Жаңажол ауылының тұрғыны, зейнеткер, ІІ-топ мүгедегі Омаров Тұрақ сөз сөйлеп, аудандық әуез мектебінің ұстаздары әннен шашу шашып, қатысушыларға мерекелік көңіл-күй сыйлады.
