Сонымен қатар Президент биылғы күзде Президент сайлауын өткізуді ұсынды. Ол өз сөзінде «Әділетті Қазақстанды құру жолында түбегейлі және жан-жақты реформаларды табысты жүзеге асыру үшін халықтың жаңа сенім мандаты қажет. Мен үшін мемлекет мүддесі бәрінен биік. Сондықтан мен өкілеттік мерзімімді қысқартуға және кезектен тыс Президент сайлауына баруға дайынмын. Сондай-ақ көп ойланып, Президент өкілеттігі мерзімдерінің санын және ұзақтығын қайта қарау қажет деген байламға келдім. Президент мандатының ұзақтығы 7 жылдық бір мерзіммен шектеуді ұсынамын. Бірақ қайта сайлануға тиым салынады» деді. Соның ішінде Парламент пен барлық деңгейдегі мәслихат сайлауларын мерзімінен бұрын өткізу туралы ұсынысы қисынды деп ойлаймын. Өйткені Парламентке Президент Тоқаевтың бағытын қолдайтын жаңа тұлғалардың келуі өте маңызды және қажетті іс.

Өз кезегінде бұл халық сенім артатын өз ісіне мығым, өмір ағымына ілесетін кадрдың еңбегін кезінде көре де, бағалай да білу керектігін көрсетеді. Сонымен қатар әсіресе, Президенттің сөзіндегі кәсібилік пен еңбеккор адамның бейнесі туралы тұжырым өте ерекше әсерлі. Қоғамда жастардың еңбекке деген құлшынысын оята білудің аса қажет екендігінің көрінісі деп білемін. Сондай-ақ, ел мүддесін жоғары қоя отырып, ауқымды істердің орындалуы мен күрделі мәселелердің шешімін табуда бағдар беретін құндылыққа ие болатындай Жолдау екені даусыз.