"Тіл - баға жетпес мұра"

Бүгін 5 қыркүйек-Қазақстан халқы тілдері күні. Осынау тарихи мерекенің еліміз үшін мәні зор, құрметі ерекше. Өйткені, тіл тағдыры - ел тағдыры. Тілдер мерекесімен тұспа-тұс келген, осындай рухани мейрамның 5 қыркүйекте тойлануына себеп болған - "Ұлттың сақталуына да, жоғалуына да себеп болатын нәрсенің қуаттысы - тіл" деген ұлағатты сөз қалдырған, қазақ халқының тағдыры мен тілі үшін күрескен Алаш арысы, ағартушы, қазақ тілі білімі мен әдебиеттану ғылымының негізін салушы, ғалым, ұлт ұстазы Ахмет Байтұрсынұлының туған күні. Бүгін барша қазақстандық қазақ әліпбиінің негізін салған ғалымның туған күнінде тілдер мерекесін тойлайды. Осыған орай Кент кітапханасында Алаш ардақтысы Ахмет Байтұрсынұлына арналған "Ұлт ұстазы" және Тілдер күніне "Тіл - баға жетпес мұра" атты кітап көрмесінің таныстырылымы өткізілді. Іс-шараға аудандық Оқушылар үйінің ұстаздары мен оқушылары келіп, көрмемен танысып, оқырман Аманғали Ұлықпан "Ана тілім-ардақтым" өлеңін нақышына келтіріп оқыды.