Тілшілер қауымына тілектестік білдірді
5 қыркүйек – Қазақстан халқы тілдері күніне орай аудандық жастар ресурстық орталығы баспасөз қызметкерлерін марапаттады.
"Ұлттың сақталуына да, жоғалуына да себеп болатын нәрсенің қуаттысы тіл" деп ұлағатты сөз қалдырған, қазақ халқының тағдыры мен тілі үшін күрескен Алаш арысы, Ұлт ұстазы Ахмет Байтұрсынұлының туған күні 2017 жылдан бастап Қазақстан халқы тілдері күні болып бекітілді. Атаулы датаға орай "Қармақшы таңы" аудандық қоғамдық-саяси газетінің бас редакторы Сәрсенкүл Жаудатбекқызы, бас редактордың орынбасары Гүлжанат Өмірқызы, фототілші Қазбек Жаулыбайұлы мен шығармашылық мамандар Ардақ Сәкенқызы, Айнұр Айдарқызы мен Ерсін Сәдуұлын ресурстық орталығының директоры Берік Байділдаев алғыс хатпен марапаттады.
– Бүгінгі таңда қоғам айнасына, ауданның жаршысына айналған "Қармақшы таңы" газетінің оқырманға берері көп. Баспасөз қызметінде еңбек етіп жүрген сіздердің ана тіліміздің қадір-қасиетін насихаттауда еңбектеріңіз зор. Алдағы уақытта қызметте үлкен табысқа жетулеріңізге шын жүректен тілектеспін, – деді Б.Байділдаев.
Аслан ЖАЙҚОНЫСҰЛЫ
