Азық-түлік бағаларына партиялық мониторинг жалғасуда

«AMANAT» партиясы Қармақшы аудандық филиалы жанынан аудан бойынша азық-түлік тауарларының бағаларына сараптама жүргізу жөнінде мониторингтік жұмысшы тобы құрылды.

Мониторингтік топтың құрамында «AMANAT» партиясы Қармақшы аудандық филиалының Атқарушы хатшысы Дастан Буханов, партия ардагері, аудандық «Қазақ тілі» қоғамының төрайымы Гүлжауһар Раева, «Сырдария» бастауыш партия ұйымының төрағасы Б.Сайдулла, «Сыбайлас жемқорлыққа қарсы іс қимыл» жөніндегі қоғамдық кеңес төрайымы С.Райымбаева қатысты.

Мониторингтік топ Жосалы кентіндегі «Орда», «Достық», «Мағжан», «Ұлар», «Аягөз» сауда орталықтарын аралады. Қазақстан Республикасының «Сауда қызметін реттеу туралы» Заңына сәйкес әлеуметтік маңызы бар азық-түлік тауарларының сатылымдағы бағаларына мониторинг жұмыстары жүргізіліп, ондағы ахуалмен егжей-тегжейлі танысып, жеке кәсіпкерлік субьектілеріне әлеуметтік маңызы бар азық-түлік тауарларының бағаларын өндірушінің босату бағасының немесе көтерме сауда арқылы берушінің сатып алу бағасының он пайызынан аспайтын шекті сауда үстемесінің мөлшерінен асырмау жөнінде ескертіліп, түсіндірме жұмыстары жүргізілді.