Ел ағасы құрмет төрінде
Аудан әкімі Әділбек Ерсұлтанов ауданның «Құрметті азаматы» Әбдірахман Құлдүйсеновті арнайы қабылдап, 75 жылдық мерейтойымен құттықтады. Ел ағасы болған Әбдірахман Құлдүйсенов мемлекеттік қызметте өтпелі, қиын кезеңде басшылық қызметтерді абыроймен атқарып, елдің дамуына өзіндік үлесін қосқан белгілі азамат. Сонымен қатар халықаралық «Қазақ тілі» қоғамы аудандық филиалының төрағасы және аудандық аумақтық сайлау комиссиясының құрамында төраға қызметтерін атқарды. Іс-шара барысында аудан әкімі мерейтой иесіне құттықтау хат тапсырып, қазақы дәстүрге сай иығына шапан жауып, құрмет көрсетті. Мұнан соң аудандық мәслихат хатшысы Әділ Қошалақов, аудандық арда- герлер кеңесінің төрағасы Асқар Мереков және ауданның бірқатар аға буын өкілдері құттықтап, жылы лебіздерін жеткізді.
«Қт» ақпарат
