Мемлекеттік рәміздер күні аталып өтті

Бүгін Жосалы кентінің Рәміздер алаңында 4 маусым – Қазақстан Республикасының Мемлекеттік рәміздер күні мерекесіне орай кең көлемді іс-шара өтті. Мемлекеттік Әнұранды орындаумен басталған жиында сөз алған аудан әкімі Әділбек Ерсұлтанов аудан тұрғындарын Мемлекеттік рәміздер мерекесімен құттықтады.
– Мемлекеттік рәміздер – бұл кез келген мемлекеттің егемендігі мен біртұтастығын бейнелейтін, оның ажырамайтын атрибуттарының бірі. Халқымыздың рухын, ұлттық салт-санасын, қаһармандығы мен даналығын, болашаққа үмітін, арман-тілегін жеткізетін ерекше құндылықтарымыз, – деді аудан әкімі өзінің құттықтау сөзінде.
Мерекелік іс-шарада аудандағы жас мемлекеттік қызметшілер Отан алдында абыройлы да адал болуға, бар күш жігерін салып халыққа қызмет етуге ант берді.
Сондай-ақ Мемлекеттік рәміздерді насихаттауға байланысты мерекелік іс-шаралар соңы авто және вело шерулермен жалғасты.
«4 маусым – Қазақстан Республикасының Мемлекеттік Рәміздер күні» мерекелік шарасы жоғары деңгейде өткізіліп, аудан өнерпаздарының әуелете шырқаған патриоттық әндері көрермен қауымға көтеріңкі көңіл-күй сыйлады.