1 - маусым халықаралық балаларды қорғау күнінде барлық бала қуанып, асыр салып ойнап шадыман шаттықта болды. Тұрмағамбет ауылында да мектеп, балабақшалар әсем безендіріліп, балаларды қуантуға ел болып атсалысты. Ауыл орталығындағы "Сәлима Ана" балабақшасының алдына Тұрмағамбет ЖШС директоры Нұржан Айдарбекұлы демеушілігімен балаларға арналған түрлі ойын құрылғылары орнатылып, балапандардың асыр салып ойнауына зор мүмкіндіктер жасады. Социалистік Еңбек Ері, Батыр анамыздың атымен аталған, баталы орында балалар күнінің мерекесі басталып, барлық ауыл балалары жиналды. Тұрмағамбет ЖШС демеушілігімен, ауыл кәсіпкерлері Гүлзат, Гүлмира сіңілілеріміздің қолдауымен барлық балаларға балмұздақтар, тәтті сусындар таратылды.

Мерекелік шара әрі қарай ауыл орталығындағы үлкен сахнада концерттік бағдарламамен жалғасты. Балалар мерекесі құтты болсын. Ашық аспан астында бейбіт өмірде, Тәуелсіз ел құшағында бақытты балалықпен өсіп, өркендей берсін. Әрқашан кемел келешектің кірпіші болар балаларымызды қуантуға асығайық.