БАЯНДЫ БОЛАШАҚ БАҒДАРЫ
Мемлекет басшысы Нұрсұлтан Назарбаевтың қоғамымыздың дамуына үлкен серпіліс әкеліп, халыққа рухани сілкініс берген «Болашаққа бағдар: рухани жаңғыру» атты бағдарламалық мақаласының жарияланғалы бері
айқындалған басымдықтар аясында бүгінде елімізде ауқымды жұмыстар жүзеге асырылуда. Нақтырақ айтатын болсақ, мақаладағы өміршең жобалардың барлығы да халық қолдауына ие болды.
Осындай ел мүддесіне арналған жобалардың бірі – «Жаңа гуманитарлық білім. Қазақ тіліндегі 100 жаңа оқулық» жобасы бойынша аударылған алғашқы 18 кітап Елбасының қатысуымен өткен алқалы жиында жұртшылық назарына ұсынылды.
Алқалы жиында Реми Хесстің «Философияның таңдаулы 25 кітабы», Джорди Ритцердің «Әлеуметтану теориясы», Элиот Аронсонның «Көпке ұмтылған жалғыз: әлеуметтік психологияға кіріспе»,Светлана Тер-Минасованың «Тіл және мәдениетаралық коммуникация», Алан Барнардтің «Антропология тарихы мен теориясы», Клаус Швабтың «Төртінші индустриялық революция» және басқа да кітаптардың аудармалары таныстырылды.
Елбасы өз сөзінде «Болашаққа бағдар: рухани жаңғыру» атты бағдарламалық мақаланың қазақстандықтар тарапынан кең қолдауға ие болғанын айтып, оның жекелеген бағыттары бойынша атқарылған жұмыстардың нәтижелеріне тоқталды. Барлық өңір «Туған жер», «Киелі жерлердің географиясы» және «100 жаңа есім» жобаларына атсалысып, бір жыл ішінде меценаттар қаражаты есебінен әлеуметтік инфрақұрылымды дамытуға ондаған миллиард теңге бөліндігін, сондай-ақ 700-ден астам мәдениет ескерткіштері жөнделіп, қайта қалпына келтірілгені сөз болды. Бұлүшін елімізде түрлі бағытта жүздеген ғылыми экспедициялар ұйымдастырылғандығы белгілі болды.
Сонымен қатар, Нұрсұлтан Назарбаев қазақ тілінің жаңа әліпбиін талқылау үдерісі біртұтас қоғамымыздың кемелденгенін танытатын тарихи қадамға айналғанын атап өтті. Рухани жаңғыру аясындағы жұмыстардың маңыздылығына тоқталып, «100 жаңа оқулық» жобасының жас ұрпаққа білім беру ісіндегі, жастардың жоғары ғылыми стандарттарға сәйкес білім алуы жолындағы маңызды роліне баса назар аударды. Бұл бағытта жасалып жатқан 800 кітаптан тұратын үздік оқулықтардың ауқымды тізімін әзірлеу, Ұлттық аударма бюросының құрылып, жаңа бағытта жұмыс жасауға кірісуі туралы кешегі алғашқы 18 кітаптың таныстырылымында жан-жақты мағлұмат берілді.
Рухани жаңғырудың негізі халқымыздың тарихы, дәстүрі, тілі, өнері мен мәдениеті десек, бұл оқулықтар қазіргі жаһандану дәуірінде алдыңғы қатарлы 30 елдің қатарынан көріну үшін, бәсекеге қабілетті ел болуымыз үшін жас ұрпақты әлемдік мәдениеттің терең қайнарынан сусындатуға бағытталған құнды құжат болғалы тұр.
Шегебай Құндақбаев,
«Ұлт бірлігі – Қармақшы» этнобағыттағы қоғамдық бірлестігінің төрағасы.
