Ақай ауылының тұрғындары тұңғыш рет өткізілген саяси науқан жергілікті атқарушы органдардың басшысын тікелей сайлау мүмкіндігіне ие болып, еліміздің тарихындағы айрықша оқиғаға белсенділікпен қатысып үлестерін қосты.
Бүгін ауылдық округ тұрғындарының дауыс беру қорытындылары бойынша «Nur Otan» партиясы атынан ұсынылған кандидат Қазиева Эльмира Ордабайқызы Ақай ауылдық округінің әкімі лауазымды қызметіне сайланды. Аудан басшылары елді мекен тұрғындарына Эльмира Ордабайқызын таныстырып, алдағы қызметіне сәттілік тіледі.
Қазиева Эльмира Ордабайқызы 1977 жылы дүниеге келген.
Білімі жоғары, инженер милиоратор, экономика және бизнес мамандықтары бойынша бітірген.
Осы уақытқа дейін Қазақстан Республикасы Президентінің «Байқоңыр» кешеніндегі арнаулы өкілінің қызметін қамтамасыз ету басқармасы мемлекеттік мекемесінің Байқоңыр қаласында негізгі мемлекетаралық бағдарламаларды жүзеге асыру мониторингі бөлімінің басшысы болып абыройлы қызмет атқарып келді.