Бұл туралы ақын Бекарыс Шойбеков әлеуметтік желіде хабарлады.
“5 шілде 08:30 шамасында елімізге танымал айтыскер ақын, ұлысымыздың ұйытқысы атанған Оңтүстіктің төл перзенті, "Парасат", "Құрмет" ордендері мен "Қазақстанның Халық ақыны" атағының иегері Әселхан Әлішеріқызы Қалыбекова 71 жасында дүниеден өтті”, – деп жазды ол желіде.
Белгілі болғандай, марқұмға созылмалы жүрек шамасыздығы диагнозы қойылған.
Ақынмен қоштасу рәсімі 6 шілде Шәуілдір ауылында өз шаңырағында өтеді.
Әселхан Қалыбекова 1950 жылы 22 сәуірде Түркістан облысы Отырар ауданы Шәуілдір ауылында туған. Қазақ КСР-нің Халық ақыны (1990) атағын алған. Қазақстан жазушылар одағының Жамбыл атындағы халықаралық сыйлығының тұңғыш лауреаты (1989). Отырар ауданының Құрметті азаматы.