Фракция отырысы өткізілді
«Нұр Отан» партиясы Қармақшы аудандық филиалында Елбасы, Партия Төрағасы Н.Назарбаевтың «Президенттің бес әлеуметтік бастамасы» атты халыққа үндеуін талкылау мақсатында аудандық мәслихаттағы «Нұр Отан» партиясының депутаттық фракциясының мүшелерінің қатысуымен отырыс болып өтті. Отырысты фракция жетекшісі, аудандық мәслихат депутаты К.Раева ашып жүргізіп отырды. Күн тәртібіндегі «Президенттің бес әлеуметтік бастамасы» атты халыққа үндеуін талкылау бойынша «Нұр Отан» партиясы Қармақшы аудандық филиалы төрағасының бірінші орынбасары Д.Буханов хабарлама жасап, бес бастамаға тоқталып өтті. Соның ішіндегі маңыздысы «Шағын несие беруді көбейту», «Жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту» мәселесіне байланысты аудандағы Қармақшы аграрлы-техникалық колледжінің жатақханасы туралы мәселе көтерілді. Одан соң аудандық мәслихат депутаты А.Қаржаубаевтың сайлауалды бағдарламасының орындалу барысы, атқарылып жатқан жұмыстары туралы есебі тыңдалды. Күн тәртібіндегі мәселелерге байланысты депутаттар Б.Нысанбаев, Н.Пірмантаев, А.Үсеновтер өз пікірлерін білдіріп, ұсыныстарын да айтып өтті. Отырысты «Нұр Отан» партиясы Қармақшы аудандық филиалы төрағасының бірінші орынбасары, фракция жетекшісі К.Раева қорытындылап, Елбасы, Партия Төрағасы Н.Назарбаевтың «Президенттің бес әлеуметтік бастамасы» атты халыққа үндеуін тұрғындар арасында, әрбір ұжымда талқылап, алдағы уақытта кеңінен түсіндіру жұмыстары жалғасатынын айтты.
