Сыр сүлейлерінің ізбасары, жырау Жаппар Тұңғышбаевтың туғанына 85 жыл толуына орай «Жыр жампозы- Жаппар жырау» атты облыстық жыршы- жыраулар фестивалі өткізілді. Жыр фестиваліне Айдынды Аралдан қарт Қаратау аймағындағы облыстық, республикалық сахналарда өнер көрсетіп жүрген 15 жыршы- жырауларымыз Тұрмағамбет ауылының аспанын жырмен әуелетіп, құлақ құрышын қандырар мақам саздарымен домбыраларынан жыр төгілдіре жырлады.
Киелі мекенде жапырағын жайып, жыр арнасында ізін қалдырған Жаппар Тұңғышбаев Тұрмағамбет ақынның қамқорлығы мен жай оғындай жарқылдаған алымдығын пір тұтып, жыр өнерге қанығып, ұтқыр ойлылығы мен сөз шеберлігін қалыптасырады. Рүстембектей, Үбісұлтандай ағаларынан үлгі алып, сол кісілерден тәлім алған Жаппар Тұңғышбаев жыр сүйер, өнер сүйер елдің,ұрпақтардың жадында мәңгі сақталары анық.