Облыс бойынша саяси қуғын-сүргін құрбандары туралы 400-ге жуық өтінім қаралды
Жазықсыз жазаға тартылғандар туралы сыры ашылмаған тарихи құжаттарды және басқа да ақпараттарды қолжетімді ету мақсатында Ішкі істер министрлігінде «Мемориал» сервисі құрылған, деп хабарлайды «Хабар 24».
Осы «Мемориалға» Қызылорда облысы бойынша 6 мыңға жуық адамның қуғын-сүргінге ұшыраған мәліметтері туралы ақпараттар енгізілген. Қызылорда облысының Полиция департаменті мен Ұлттық қауіпсіздік комитеті Департаментінен қуғынға ұшыраған не ақталған азаматтарға қатысты қылмыстық істер, сонымен қатар Ұлы Отан соғысы кезінде тұтқынға түсіп, Германиядан келген бұрынғы КСРО азаматтары туралы іріктелген материалдар қабылданды. «Мемориал» сервисінің әлеуметтік-саяси маңыздылығы ел өңірлерінен және ТМД елдерінің тұрғындарынан келген хаттарда айқын жазылған. пазылбек нәлібаев, облыстық полиция департаменті бастығының орынбасары:– Бүгінде біздің департаментке қуғын-сүргінге ұшыраған азаматтардың туыстарынан өтініштер келіп түсуде. Олардың 400-ге жуығы бүгінгі таңда нәтижесін тапты. Өмірдің осынау қиын кезеңінен бастап басынан кешірген туыстары туралы мағлұмат іздеген азаматтар үшін біздің берген ақпаратымыз баға жетпес байлық. Сондықтан алдағы уақытта да бұл жұмыс жалғасын табады.
