Көпбалалы ана баспаналы болды

Бұл ең алдымен мешіт тарапынан ұйымдастырушылық пен түсіндірушілік насихаттың жемісі десек, екіншіден қайырымды жандардың әркез қайырлы іс істеуге, мұқтаж адамға қол ұшын созуға деген мейірімі мен жанашырлығының көрінісі болса керек. Әрине мұндайда ауданның бас имамы Жақсыбек Әбеновтің бастамасымен құлшылық үйінің жанынан құрылған жамағат пен аға буын өкілі, сондай-ақ елжанды жастардың ауызбіршілігі мен ықылас-ниетін ескере кеткен жөн.

Міне қасиетті жұмада осындай қайырымды жандардың ұйытқы болуымен «Қармақшы ата» мешітінде өңірімізде сан бойынша 8-ші пәтердің кілтін табыстау сәтіне куә болдық. Қазақ халқында жиі айтылатын «Жұмыла көтерген жүк жеңіл» деген даналыққа тағы бір бас идік. Жосалы кентінің тұрғыны, көпбалалы ана Әсемкүл Көпбосыноваға Қазақстан Мұсылмандар Діни басқармасының Қызылорда облысы бойынша өкілі, «Ақмешіт-Сырдария» мешітінің бас имамы Болатбек Ұласханұлы жаңа баспананың кілтін табыстады.

– Биыл Қазақстан Мұсылмандар Діни басқармасының құрылғанына – 30 жыл. Айтулы датаның аясында Бас муфтидің идеясымен «Нұр Мүбарак» университетіне 30 грант бөлу, 30 аяқжол өтетін көпір салу, 30 құдық қазып беру, тағы басқа шаралар жоспарланып, іске асырыла бастады. Оның арасында 30 діни қызметкерді, яғни жас маманды баспаналы ету де күн тәртібінде. Соның бірі – жергілікті кәсіпкерлердің демеуімен Ақтөбе ауылының имамына жеке басыбайлы баспана берілмекші. Республикада 30 мешіт бой көтереді деп күтілсе, соның бірі – Төретамда. Жақында ғана оның іргетасын қалап қайттық, – дейді бас имам.

Жақсылық жасап жарысудан ауданымыз алдыңғы қатарда тұр десек, артық айтқандық емес.

– Үйлі болғаныма қуаныштымын. Көптен күткен арманымыз еді. Газ плитасын да сыйға тартты. Менің көпбалалы ана екенімді елеп- ескерген діни қызметкерлер мен қайырымды жандарға көптен-көп алғысымды білдіремін, – дейді жаңа пәтердің иесі.

Бұл күні мешітте пәтер кілтін табыстаумен бірге, әлеуметтік жағынан әлжуаз 10 отбасына азық-түлік пакеті берілді.