Арзан өнім – жәрмеңкеде

Қармақшылықтардың  көптен күткен жәрмеңкесі өткен аптада кент орталығындағы Сексенбаев көшесі бойына жайғастырылды. Ауылшаруашылық өнімдерінің сатылымында кісі қарасы қалың. Таң атпай орталыққа ағылған жұрт арзан өнімдерді ептеп емес, көптеп алуға тырысты. Жәрмеңкенің өту барысын ауылшаруашылығы бөлімі мамандары қадағалады. Арзан бағадағы өнімге талас-тартыстың жасырын емес. «Байқоңыр» әлеуметтік кәсіпкерлік корпорациясы (Өңірлік тұрақтандыру қоры) жәрмеңкеге арзан бағада 10 тонна картоп, 4 тонна жуа, 2,5 тонна сәбіз, 400 келі макарон өнімін әкелді.  
Картоптың келісі – 80, жуа – 70, сәбіз – 75, макарон – 2800 теңгеден (20 келілік қап) сатылған соң арзан азық-түлік санаулы сағаттың ішінде түгесілді.  Мұндай жәрмеңке жыл басынан бері Жосалы кентінде 2, Төретамда 2 рет ұйымдастырылып отыр. Кенттұрғындары үшін ұйымдастырылатын ауылшаруашылық өнімдерінің жәрмеңкесі алдағы уақытта да жалғасын табатын болады.

Гүлжанат ДҮЗЕНОВА
Қазбек ТАЙБАҒАРОВ (сурет)