Облыс әкімі Сырдың Сәлимасына құрмет көрсетті

– Еңбектің шыңын бағындырып қана қоймай, дүниеге көп бала әкеліп, оларға саналы тәрбие бердіңіз. Сыр өңірінің мақтанышына айналған сіздің өмір, еңбек жолыңызды, жеңісіңіз бен жетістігіңізді жас ұрпаққа үлгі етеміз. Алғашқы тың игеру кезеңінде республикамыздың қоймасына құйылған миллиард пұт астыққа Сіздің де қосқан үлесіңіз зор, – деді құттықтауында аймақ басшысы.

Сәлима анамыз өзіне білдірілген құрметке алғыс айтып, ақ батасын берді. Елге тыныштық тіледі. Ыбырай Жақаевтың ізбасары ретінде ерлермен иық теңестіріп еңбек еткен Сәлима Жұмабекованың еңбек жолы Ақжар ауылында сауыншылықтан басталған. Байланысшы, құрылысшы болып ауылдың түтінін түзу ұшыруға өз үлесін қосқан. Ауылдық кеңесті басқарған С.Жұмабекованың жұлдызды сәті күріш шаруашылығымен тығыз байланысты. Батыр ананың Сыр маржанын өсірудегі өлшеусіз еңбегі елеусіз қалған емес. Осыған дейін «Құрмет белгісі», «Ленин» орденімен марапатталса, 1980 жылы Социалистік Еңбек Ері атанды. Ал 2000 жылы «Ғасырдың Батыр анасы» атағын алса, келер жылы Астанада Елбасының қабылдауында болды. Аңыз ананың 70 жасқа толуына орай 2005 жылы «Сыр сұлуы, Батыр ана – Сәлима» атты деректі жинақ құрастырылып, телеха- бар түсірілді. 80 жылдық мерейтойы да Сыр халқымен бірге кең көлемде аталып өтілді. Оның құрметіне «Сәлима» атты күріштің жаңа сорты өндірілді. Туған ауылы Тұрмағамбетте жаңадан бой көтерген балабақшаға есімі берілді.