ЖОСАЛЫ, 21 желтоқсан – qarmaqshy-tany.kz  Бала бойындағы жақсылы-жаманды қасиеттерін байқаса, қазақ оны ең бірінші әке мен ата тәрбиесінен көреді, тегіне тартқан дейді. "Әкесі сондай адам еді, атасы жақсы адам, көргенді бала" деп ер адам тәрбиесін ауызға алады. Өйткені әкесінің баласына қалдырған ең үлкен мұрасы – оның жақсы тәрбиесі. Ал әке мектебінен өткен бала сол мұраға қиянат жасамауға тырысқан. Бүгін Қармақшы ауданы, Төретам кентіндегі #85 орта мектепте "Ғибрат" әкелер мектебінің кезекті отырысы болып өтті. Әр сыныптың әкелер кеңесінің төрағалары қатысқан бұл отырыс "Отбасындағы әке рөлі қандай?" тақырыбында өткізілді. Қатысқан әкелер өз ойларын ашық айтып, қазіргі таңда бала тәрбиесінде, соның ішінде ер балаларды тәрбиелеудегі қиындықтар мен ерекшеліктерге тоқталды. Отырысқа Төретам кенті ардагерлер кеңесінен Ә.Ниязбаев, Байқоңыр қалалық діни басқармасынан К.Нұрсұлтан және мектеп директорының тәрбие жұмыстар жөніндегі орынбасарлары мен мектеп психологтары қатысты. Қорытындылай айтқанда, әр отбасындағы әкенің рөлі ерекше. Әке – отбасының асыраушысы, отбасы мүшесінің тірегі, қамқоршысы. Әкенің мінез-құлқы, өзгелермен қарым-қатынасы, өнері мен білімі – баланың көз алдындағы үлгі-өнеге алатын, оған қарап өсетін нысанасы. Әке балаға жолдас әрі сырлас болу керек. Ол әрқашан бір әрекет жасау үшін әуелі әкесімен ақылдасады. Сондықтан дәстүрлі қазақ қоғамында тәрбие алған қазақ баласының әкеге деген құрметі ерекше болатын. Жүзінен мейірім төгіліп тұрмағанмен, қас-қабағынан бәрін түсініп өскен бала әке қаһарынан сескеніп жүретін. Әке тәрбиесі – деген осы. Ер баланың өсіп, жетіліп, өз алдына жеке тұлға болып қалыптасуында, қоғамдағы өз орнын дұрыс таба білуінде әкенің атқаратын еңбегі ерекше. "Бір бала бар әкеге жете туар, бір бала бар атадан өте туар, бір бала бар атадан кері кете туар" деген халқымызда дана сөз бар. Ал дұрыс тәрбие алған бала қоғамға пайдасын тигізетін азамат болып өседі.