Осыған байланысты, аудан әкімінің тапсырмасына сәйкес шұғыл түрде тиісті жұмыстар атқарылып, қауіптің алдын алу жұмыстары жүргізілді.

Алдын-алу шараларына жергілікті атқарушы органнан қатыстырылған күш-құралдар 27 қызметкер, 4 бірлік техника және аудандық төтенше жағдайлар бөлімінен 10 қызметкер мен 1 бірлік техника жұмылдырылды және тиісті қорғаныс бөгеттеріне қосымша нығайту жұмыстары жүргізілді.

Қолданылған инертті материалдарды атап өтетін болсақ 50 бау қамыс, 20 дана қада, 1000 дана қап пайдаланылды.

2019 жылдың 5 желтоқсан күнінен бастап Сырдария өзенінің қауіпті деңгейінің жетуіне байланысты, аудан әкімдігініде жедел штаб отырысы өткізілді.

Жалпы қауіпті болып саналатын елді-мекендер Жосалы кенті және Қармақшы, Иіркөл, Жаңажол, Төребай би ауылдық округтері бойынша мекеме қызметкерлерінен тәуліктік кезекшілік кестесі жасалып, аудан әкімімен бекітілді.

Кезекшілік жұмыстары 2019-2020 жылдардың қыс-көктем мезгілдеріндегі су тасқыны мерзімі аяқталғанға дейін ұйымдастырылады.

2019 жылдың 6 желтоқсан күні республикалық деңгейдегі сала мамандары Су ресурстар комитеті төрағасының орынбасары М. Т. Аяшов, «Қазсушар» РМК-нің бас директоры Б. С. Арыстанбаев ауданымызға келіп, Сырдария өзенінің жағдайымен танысты.

Ағымдағы жылдың 7 желтоқсан күні облыс әкімі Қ. Ысқақов, сонымен бірге облыстық жұмылдыру дайындығы басқармасының басшысы А. Шаменов, облыстық төтенше жағдайлар департаментінің басшысы О. Бержанов, «Арал – Сырдария бассейіндік» инспекциясының басшысы Ә.Қарлыханов, «Қазсушар» РМК Қызылорда филиалы директорының орынбасары Ж. Ерназаров, аудан әкімі М. Қалдарбеков Қармақшы ауданының аумағынан өтетін Сырдария өзенінің жағдайымен танысып, мұз ұстасу кезінде болуы мүмкін су тасқынының алдын-алу бойынша тиісті жұмыстарды талқылап, аймақ басшысы аталған мәселені бақылауда ұстауды тапсырды.

Үстіміздегі жылдың 10 желтоқсан күні Жосалы кентінен шамамен 6 шақырым қашықтықта, «Батыс Еуропа - Батыс Қытай» автодәлізінің 628/1639 шақырымында Сырдария өзенінен жайылған су асфальт жиегіне жақындап, су шайып кету қауіпін алдын – алу мақсатында аталған жерге «Қазақавтожол» мекемесімен Қармақшы ауданы әкімдігінен барлығы 10 бірлік техника, 19 адам жұмылдырылып, жолдың 600 метр болатын жиегін топырақпен көтеру жұмыстары жүргізілді.

Сонымен қатар, жол-көлік қозғалысы қауіпсіздігін сақтау мақсатында аудандық полиция бөлімінен 2 арнайы автокөлік, 4 қызметкер тартылды. Аталған мәселе тұрақты бақылауда ұсталып отыр.

Бүгінгі күнге мұз Сырдария бойымен есептегенде Қызылорда су торабынан төмен 314 шақырым, Жосалы кентінен 22 шақырым төмен «Жапырақшы» учаскесінде жылым болып ұстасып тұр.

Үстіміздегі жылдың 13 желтоқсан күні Қармақшы ауданының әкімі М.Қалдарбеков және төтенше жағдайлардың алдын алу бойынша құрылған штаб мүшелері Жосалы кентінің аумағынан өтетін Сырдария өзенінің жағалауын аралап шықты.

Жосалы кентінің тұсында Сырдария өзенінің деңгейі – 98,83. Қызылорда су торабынан өтіп жатқан су көлемі - 390,0 м³, Айтектен өтіп жатқаны - 252,0 м³, Қараөзекке өтіп жатқаны 130,0 м³. «Қармақшысушар» өндірістік учаскесі мекемесінен күнделікті мәлімет алынып, Сырдария өзеніне мониторинг жұмыстары жүргізілуде.

Құрметті аудан тұрғындары!

Қазіргі таңда, Жосалы кенті мен елді-мекендерге және «Батыс Еуропа - Батыс Қытай» автодәлізіне қауіп төніп тұрған жоқ. Аталған мәселе аудан басшылығының тұрақты бақылауында.