Сортөбеге саяхаттады
ЖОСАЛЫ, 31 қазан - qarmaqshy-tany.kz Аудандық психологиялық-педагогикалық түзету кабинетінің меңгерушісі Ләззат Мусаева, кабинет мамандары және аудандық тарихи-өлкетану музейінің ұйымдастыруымен түзете-дамыту сабағын алатын балалар мен ата-аналары "Сортөбе қалашығына" экскурсия жасады. Сыр өңірінде адамды тарих жетегіне жетелейтін ежелгі қалалар мен көне қоныстар баршылық. Солардың бірі - Қармақшы ауданында орналасқан Сортөбе қалашығы. Бұл жерден әртүрлі құмыра сынығы, нан жабуға арналған тандыр пештер, мал сүйектері мен мыстан жасалған басқа да заттар табылған. Қармақшы аудандық тарихи-өлкетану музейінің қызметкерлері Сортөбе қалашығының тарихымен таныстырды. Түзете-дамыту сабағын алатын балалар мен ата-аналар Сортөбе қалашығының тарихи жәдігерлерінің түрлерімен танысып, қалашықта жүріп жатқан қазба жұмыстарының куәсі болды.
