Емдеу ұйымы жұмысын кеңейтті
qarmaqshy-tany.kz Байқоңыр қаласындағы қазақстандық емдеу ұйымы 2016 жылы облыстық медицина орталығының филиалы болып ашылған. Аурухана 30 төсек орынға арналып, терапия, қалпына келтіру және күндізгі емдеу бөлімдері ашылды. Ем алуға қала тұрғындарымен қатар, Арал, Қазалы, Қармақшы ауданының жұртшылығы да келді. Алғашқы жылы аталмыш нысанда 1200-дей науқас ем қабылдады, деп хабарлайды Өңірлік Коммуникациялар Қызметі.
- 2018 жылы аурухана жанынан Байқоңыр қаласы және Ақай, Төретам елді мекендерінің тұрғындарына арналған емхана ашылды. Бүгінгі таңда емханаға 41 800 тұрғын тіркелген. Биыл тамыз айында аурухана "Байқоңыр қалалық көпбейінді аурухана" болып қайта құрылды. Сонымен қатар хирургия, гинекология, жансақтау сынды бөлімдер ашылып, қазір аталған бағыттар бойынша науқастар ем алуда, - деді Байқоңыр қаласындағы көпбейінді қалалық ауруханасы бас дәрігері Жандос Қойшыбайұлы.
Сондай-ақ, тұрғындарға көрсетілетін медициналық қызметтің сапасын арттыру мақсатында 24 млн теңгеге заманауи зертханалық құрал-жабдықтар алынып, аурухананың материалдық-техникалық базасы толықтырылды.
