Жұмыссыздықты азайтудың жолы

– «Қазақстан - 2050» стратегиясында Қазақстанды әлемнің ең дамыған 30 елінің қатарына кіргізу мақсаты қойылды. Дамудың маңызды көрсеткіштерінің бірі – 2050 жылға қарай шағын және орта бизнес үлесін 50 процентке жеткізу. Елбасы әрбір маңызды басқосуда кәсіпкерлікті дамыту жөнінде айтып, тиісті тапсырманы беріп те жатыр. Осыған орай, мемлекет экономиканы тұрақтандырудың негізгі бағыты ретінде кәсіпкерлікті дамытуға барынша қолдау көрсетіп келеді.

Бүгінде ҚР Президенті Қасым-Жомарт Кемелұлы өзінің Жолдауында шағын және орта бизнес – қала мен ауылды дамытудың берік негізі екенін айтты. Шағын және микробизнес еліміздің әлеуметтік-экономикалық саяси өмірінде маңызды рөл атқарады. Атап айтқанда, ең алдымен ауыл тұрғындарына тұрақты жұмыс береді, жұмыссыздықты азайтады. Сондықтан мемлекет алдағы уақытта да бизнеске қолдау көрсете береді. Бұл мақсатқа ұлттық қордан 100 миллиард теңгеге жуық қаржы бөлді. Осыған орай Мемлекет басшысы есеп комитетіне және қаржы министрлігіне қаражаттың жұмсалуын қатаң бақылауға алуды тапсырды. Біз алдағы уақытта шағын кәсіпкерлікті бүкіл қоғам болып қолдауымыз керек.