Мысырда 2500 жылдық көне ғибадатхананың қалдықтары табылды
Мысырдағы Бахария оазисінде археологтар шамамен 2500 жыл бұрын салынған ежелгі ғибадатхана кешенінің қалдықтарын анықтады. Бұл тарихи нысан Әл-Қаср Әл-Қадим қасиетті аймағында орналасқан және ол Мысырдың 26-әулеті дәуіріне жатады, деп хабарлайды Egemen.kz.
Қазба жұмыстары барысында мамандар құмтастан тұрғызылған 16 бағаналы үлкен залды және оған жалғасқан бірнеше бөлмені тапты. Сонымен қатар, перғауын І Псамтиктің атақтары жазылған тас блоктар мен ежелгі құдайлар Амон-Ра, Амунет және Хонсуға қатысты иероглифтер анықталды.
Археологтар бұдан бөлек ІІ Аменхотеп кезеңіне тиесілі стеланы және ІІ Рамсес заманынан қалған бірқатар құнды жәдігерлерді тапқан. Зерттеушілердің айтуынша, ғибадатхана құрылысы І Псамтиктің тұсында басталып, кейін оның мұрагерлері тарапынан аяқталған.
Жаңа табылған деректер Бахария оазисінің ежелгі Мысыр дәуірінде маңызды әкімшілік әрі діни орталық болғанын тағы бір мәрте дәлелдеп отыр. Бұл жаңалық көне өркениеттің тарихын тереңірек зерттеуге мүмкіндік береді.
