ӨМІР ЖОЛЫ (2-бөлім, болған оқиға)

Бүгін бұл отбасы үшін ерекше, әрі тосын сыйларға толы күн болды. Осы уақыт аралығында көңілді күндері санауға да жетпеген еді. Алайда, Самалдың әкесі жұбайы мен құлыншағын халықаралық әйелдер күнінде қуантпақ болып, үлкен раушан гүлдерін сыйға тартып, оларды қалай жақсы көретінін,  ол үшін қымбат екендерін айтып ерекше кеш ұйымдастырды. Анасы мен қызының жүзіне үйірілген күлкі әке көңілін орнына түсіргендей болды. Таң ертең ерте оянған Самал әкесінің бөлмеге келіп оятқанын күтті. Себебі, әр бір атқан таң сайын бетінен сүйіп, құшағына алушы еді. Есікті ашқан анасының өңі бозарып, көздері жасқа тола әлденені жасырғандай телміре қарап, жерге отыра кетті. Самал не болғанын қайта-қайта сұрап әлек. Анасының бар жауабы тек бір бет парақта еді. Самал қолына сол хатты алып оқыса да еш түсінер емес. Қайта-қайта көз жүгірітіп оқып жатты. Иә, бұл Самалдың әкесінің хаты еді. Осыдан 3 жыл бұрын ісік ауруына шалдыққанын білсе де отбасына тіс жармаған. Жақындарының жанына қаяу салу ол үшін ауыр еді. Кешегі күн қоштасу күні екен. Азанда көзі мәңгілікке жұмылып, айта алмаған бұл сырын қағазға жазып кете барыпты...
  

ӨМІР ЖОЛЫ 1-бөлім

Ес жия алмай біршама күнде өтіп жатты. Анасы жалғыз үміті үшін әлі күресіп келеді. Уайымнан да, құсадан да өз-өзін іштей жеп, бірте-бірте шөгіп барады. Денсаулығы сыр беріп үміті де үзіліп жатқандай. Бұны көру Самалға оңай емес еді. Анасының қиналғанын көріп бар күшімен аяққа тұруға ұмтылды. Күні-түні талпыныспен жүріп кетуі үшін күресті. Бір Аллаға сеніп шарасыз күйден шығуына жалбарынды. Алла ұлық! Қаншама жыл белгілі дәрігерлер емдеп, қымбат оталар жасалса да еш нәтиже болмаған еді. Ал енді Самалдың аяқтары бірте-бірте қозғала басталды. Одан соң балдақпен жүруге көшті. Ең бастысы сенім мен талпыныс керек екен. Бұл уақыт аралығында анасы төсек тартып жатып қалған еді. Бұрыңғыдай байлықта жоқ, дәулетте жоқ. Барлық мансап осы жалғыз қыздары үшін жұмсалған болатын. Ал ендігі  кезек Самалда. Аяққа тұрамын деп жүріп оқуы да жайына қалған еді. Анасы үшін қара жұмыстар жасап күнелтіп жатыр. Шағын кәсіп ашу да ойында бар. Бүгінгі тапқан азын-аулақ табысына анасын қуантпақ болып тәттілерді дорбаға толтырып үйіне асығып жүріп келеді...
  Анасы үшін баласының амандығы қандай бақыт болса, бала үшін де ана мейірімін көру соншалықты қымбат. Бақыт деген белгілі бір күнге немесе байлыққа тірелмейді. Әр бір атқан арайлы таңымыз, өтіп жатқан әр бір күніміз бақыт емеспе?

                                                                                                                               Айнұр ӘЛИ.