Жаңбыр жыры
Қара бұлт жайып қанатын,Сейілмей жүрсе мұң-қайғым.
Тасырлап көктен таматын
Жаңбырдың жырын тыңдаймын.
Тылсымы ғажап не деген!
Жүрегім содан от алар.
Жанымды нұрға бөлеген
Шатырда ойнап ноталар.
Көз жасы сынды талайдың,
Түскен бір тағдыр тезіне.
Аяныш көзбен қараймын
Мөп-мөлдір тамшы көзіне.
Менің де мазам қашады-ау,
Үзілсе кенет арман-ән.
Шөлейт жер шөлін басады-ау,
Ал менің шөлім қанбаған.
Жауады әлі сан талай,
Мен үшін сый боп күтпеген.
Ұқпайсың неге, қалқам-ай,
Жылауық емес бұлт деген.
Өзіңде өзге ой бар ма осы,
Жақсы ырым десең... мақұл-ды.
... Төгіп тұр нұрын Алласы
Малшынтып Достық ақынды.
Достық Тілеубергенов.
