– «Ақмаржан» кафесі жанынан ша­ғын жай жалдағаныма екі жылдай бол­ды. Бидай көжеге сұраныс жақсы. Тұрақ­ты тұтынушыларым бар. Байқоңыр қала­сының тұрғындары бидай көжені тапсырыспен алдыртады. Трассаның бойынан өткен жолаушылар да сусынын осы бидай көжемен қандырып жатады, – дейді кәсіп иесі.
Бидай-құнарлылығы жағынан жо­ғары тағам түріне жатады. Ата-бабамызда ертеден келе жатқан қадірлі астың бірі. Ауызға айту оңай болғанымен, бидай көжені дәмді етіп пісірудің өзіндік сыры да жоқ емес. Гүлбаршын таңсық асты пісіруді алғашында анасындай болып кеткен енесі Қалимаш Әбдікеровадан үйреніпті. Апасы көже пісірудің қыры мен сырын келініне үйретуден жалықпаған.
– Бидайда калория көп. Қатыққа былғаған соң, одан сайын оның дәмі артады. Отбасылық кәсібімізге апам үлкен көмекші. Өйткені, бидай көжені өз деңгейінде пісіруде шеберлікті көп керек етеді. Бабы болмаса, дұрыс шықпайды. Көже дұрыс шығу үшін бидайды қолдап келіге түйеміз. Сосын барып желпіп, суыру жұмысын жүргіземіз. Бұл үрдіс екі мәрте жасалады. Сонан соң қазанға асылып, біраз бұқтырылады. Асылған бидайды өз деміне қойып, буып тастаймыз. Ыстығы басылған соң қатыққа араластырып, тұтынушыға ұсынамыз, – дейді көже пісіруші.
Ұқсас жаңалық
КЕСЕК ЖЕУДІҢ КЕСІРІ БАР МА?