Өрендер 3 кезең бойынша бақ сынасты. «Білімдіден шыққан сөз» деп аталған алғашқы кезеңде шәкірттер ақын өлеңдерін жатқа оқыды. Абайдың 100-ден аса өлеңімен қатар, «Ескендір» поэмасын, бірнеше қара сөзін жатқа айтқан дарынды да талантты өрендер талайға таңдай қақтырды. Бұл кезең бойынша ІІІ орынды №183 мектептің оқушысы Қуаныш Тасбергенов иеленсе, ІІ орынды №250 мектеп-лицейдің оқушысы Нұрби Кеңесбаева мен №277 мектептің оқушысы Мерей Алдамжарова місе тұтты. Ал жүлделі І орынды №29 мектептің оқушысы Іңкәр Бижан қанжығасына байлады.

   Сайыстың «Өлеңге әркімнің де бар таласы» атты екінші кезеңінде оқушылар Абайға арналған жыр шумақтарын жатқа оқыды. Абай даналығын жүрегіне қондырып, өз өлеңіне арқау етті. Аталған кезеңде ІІІ орынды №274 мектептің оқушысы Жанель Тоқтар иемденсе, ІІ орынға №121 мектептің оқушысы Еркебұлан Серіков лайық деп танылды. Ал жас ақындар арасынан І орынды №106 мектептің оқушысы Ақерке Бақбергенова жеңіп алды.

   Байқаудың үшінші кезеңі «Әсем ән мен жыр тербеп» деп аталды. Бұл кезеңнің шарты – Абай әндері мен жырларын Сыр сүлейлерінің мақам-сазына салып орындау. Сыр жауһарларын бойына сіңіріп өскен өрендер сайыстың бұл кезеңінде де мүдірген жоқ. Бұл кезеңнің қорытындысы бойынша ІІІ орын №80 мектептің оқушысы Диас Төлегеновке бұйырса, ІІ орынға №121 мектеп оқушысы Айдана Амантай ие болды. Ал дарындылар арасынан оза шапқан №273 мектептің оқушысы Айбол Оралбекұлы жүлделі І орынды жеңіп алды. Жеңімпаздар аудандық мәдениет және тілдерді дамыту бөлімінің алғыс хатымен және бағалы сыйлығымен марапатталды.