Еркін күрес шебері Ризабек Айтмұхан 23 жасқа дейінгі жасөспірімдер арасында өткен әлем чемпионатында жеңіске жетті. Бұл туралы Stan.kz ақпарат агенттігі хабарлайды.

97 келі салмақ дәрежесіндегі финалда ол ирандық қарсыласын айқын басымдықпен жеңді. Былтыр Айтмұхан ересектер арасындағы әлем чемпионатында 92 келі салмақ дәрежесінде чемпион атанған еді. Бұл – Қазақстан тарихындағы еркін күрестен алғашқы алтын медаль.

Биыл 20 жастағы Айтмұхан 20 жасқа дейінгі жасөспірімдер арасында да әлем чемпионы атанды. Ол болашақта Олимпиада алтынын жеңіп алу үшін бар күш-жігерін салатынын уәде етті.

Еске салайық, бұған дейін 26 қазанда Ризабек Айтмұхан әлем чемпионатының алтынына таласатынын жазған едік. Алғашқы айналымда канадалық Каллум Уильям Нокты, екінші белдесуінде польшалық балуанды және жартылай финалда ресейлік Имам Гаджалиевті 7:4 есебімен ұтып, үшінші рет әлем чемпионатының финалына шығып отыр.