Головкин бір белбеуінен айырылуы мүмкін

Орта салмақта WBA (Super), IBO, WBC және IBF тұжырымдары бойынша әлем чемпионы қазақстандық боксшы Геннадий Головкиннің (38-0-1, 33 КО) командасы мен украиналық Сергей Деревянченконың (12-0, 10 KO) өкілдері таяу уақытта кездесіп, IBF тұжырымы бойынша мәндеттелген жекпе-жек мәселесін талқылайды, – деп хабарлайды BoxingScene.com. Осыған дейін, IBF ұйымы Головкинге белбеуді қорғайтын мерзімді 3 тамызға дейін айтуы тиіс деген шарт қойған еді. Олай болмаған жағдайда қазақстандық боксшы белбеуінен айырылады. GGG промоутері Том Леффлер ұйым өкілдерінен тағы біршама уақыт сұрауды көздеп отыр, себебі Головкин күзде Сауль Альвареспен (49-1-2, 34 КО) екінші жекпе-жек өткізуді көздеп отыр. Головкин – Деревянченко жекпе-жегіне қатысты тыңдалым 22 мамырда жергілікті уақыт бойынша Нью-Джерси штатындағы қонақүйлердің бірінде өтеді. Украиналық боксшының промоутері Лу ДиБелла, менеджері Кит Коннолли, Деревянченконың өзі және адвокаты болады. Ал қазақстандық боксшы адвокатын және Леффлерді алып барады. Осыған дейін Деревянченко Головкиннің промоутерін алаяқ деп, қазақстандық боксшы өз міндетін орындауды талап ететінін айтқан. Осыған дейін, Головкин 5 мамырда америкалық Ванес Мартиросянмен (36-4-1, 21 КО) жекпе-жекке шығу үшін, яғни IBF тұжырымы бойынша міндеттелген қарсыласпен кейінірек кездесуі үшін 20 мың АҚШ долларын бергені айтылады.