qarmaqshy-tany.kz Бүгін Жосалы ауылдық округінде «Қазақстан Республикасы білім беру ісінің үздігі», ардагер ұстаз Бекқадам Әлиасқар Әбілтайұлын еске алуға арналған волейболдан білім саласы қызметкерлері арасында турнир өтті.

Биыл алғаш рет ұйымдастырылып отырған турнирдің ашылу салтанатына аудан әкімі Ерсұлтанов Әділбек Бөрібайұлы қатысып, ұзақ жылдар бойы білім саласында ұстаздық етіп, ұрпақ тәрбиесіне зор еңбек сіңірген ардақты ел ағасының өнегелі өмір жолына тоқталып, турнирге қатысушы командаларға сәттілік тіледі.

Сондай-ақ, аудандық мәслихат төрағасы Әділ Қошалақов пен аудандық ардагерлер кеңесінің төрағасы Асқар Мереков сөз алып, Әлиасқар Әбілтайұлының ел дамуына қосқан ерен еңбегі мен өнегелі жолын барша жұртшылыққа дәріптеу керектігін тілге тиек етті.

Бекқадам Әбілтайұлы 1966 жылы «Жосалы» кеңшары құрылғанда осы ауылдағы №199 мектепке директор болып тағайындалып, зейнет демалысына шыққанға дейін білім саласында ұстаздық еткен.

Ұзақ жылғы ұстаздық еңбегі бағаланып, «Қазақстан Республикасы білім беру ісінің үздігі» төсбелгісімен, басқа да мақтау грамоталары, алғыс хаттармен марапатталған.

Ардагер ұстаз зейнетке шыққаннан кейін де ауыл ақсақалдары кеңесінің төрағасы болып, ауылдың рухани-әлеуметтік дамуына белсене араласып, ел құрметіне бөленген.

Ұстаз есімі ұлықталған спорттық додаға аудан бойынша 6 команда бақ сынап, тартысты ойын көрсетті.