qarmaqshy-tany.kz Бүгін «Евразия» спорт кешенінде Қармақшы ауданының құрметті азаматы Болатбек Сүлейменовті еске алуға арналған дзюдодан 2003-2005 ж.т жастар арасындағы XXI халықаралық турнирдің ашылу салтанаты болып өтті.
Шараны облыс әкімінің орынбасары Сақтағанов Нұрымбет Аманұлы ашып, облыста дзюдо спортының дамуына үлес қосып жүрген барша азаматтарға және жарысқа демеушілік еткен Б.Сүлейменовтың ұрпақтарына алғысын білдірді.
Дзюдодан ҚР мемлекеттік жаттықтырушысы Қонысбаев Жандос Абумуталифұлы құттықтау сөзі барысында Б.Сүлейменовтың ұлы, турнирдың бас ұйымдастырушысы Сүлейменов Сағатбекке шапан жауып, оған және облыстағы дзюдо спортының дамына атсалысқан бірқатар жаттықтырушылар мен қызметкерлерге алғыс хат табыстады.
Болатбек Сүлейменовтің қарындасы, медицина саласының ардагері Әсия Сүлейменова өз кезегінде, дәстүрлі түрде өткізіліп келетін турнирдің өскелең ұрпақ үшін берері мол екендігін және осы турнирден түлеп ұшып, бүгінгі таңда Әлем, Азия шыңдарын бағындырған чемпиондар қатары жылдан-жылға артып келетінін атап өтті.
Жалпы турнирге еліміздің 17 облысынан және Өзбекстан, Қырғызстан елдерінен 400-ден аса жас палуан қатысуда. Жарыс екі күн қатарынан өтіп, ертең кешке қорытындыланбақ.