Теңбіл доп додасы
Тәуелсіздік – тәңірдің біздің ұрпаққа берген үлкен бақыты, халқымыздың мәңгілік құндылығы. Азаттықты аңсаған қазақ халқының асыл арманының орындалғанына биыл 28 жыл толып отыр. Елдің елдігін сақтап қалу, ұлттың еңсесін тіктеу, халықтың сенімін ақтау аса күрделі іс болатын. Тәуелсіздік – бұл азап пен төзімнің арқасында келді. Халықтың сан ғасыр бойы еркіндікті аңсаған арманы орындалды. Ал егемендік алу жолында азаттық үшін күрескен боздақтарды еске алу – ол әрбіріміздің міндетіміз.Аудан орталығындағы №183 орта мектебінде шағын футболдан өткен облыстық турнир Желтоқсан құрбандарын еске алуға арналды. Жыл сайын дәстүрге айналған бұл шара биыл да желтоқсаншы Ерлан Бисенбаевтың ұйымдастыруымен спортсүйер қауымын білім ошағына тоғыстырып, жалғасын тапты.
Жиында аудан әкімінің орынбасары Әділ Қошалақов ұлттық мерекемен жиналған жұртшылықты құттықтап, жарысқа катысушыларға сәттілік тіледі. Сонымен қатар Желтоқсан оқиғасының куәгері Қали Бүркітбайұлы да сөз алып, азаттық жолында алаңға шыққан арыстарымыз халықтың жадында мәңгі қалатынын жетізді.
Теңбіл доп додасына жасөспірімдер арасында өңірден сегіз команда бақ сынады. Футболдың көрігін қыздырған спортшылар қызу тартыс көрсетті. Бұл сөзімізге сайысқа қатысушылар мен оны тамашалауға келген жастардың үлес салмағының өзі дәлел. Жеңімпаз командаларды Жетоқсаншы қонақтар арнайы номинациялар мен марапаттап, спортта жоғары табыс тіледі. Жарыстың жүлдегерлерін атап айтар болсақ І орынды Ақжар ауылының командасы, ІІ орынды Байқоңыр спорт мектебі алса, ал ІІІ орынға аудандағы №15 спорт мектебі жайғасты. Сонымен қатар «Үздік ойыншы» Ғалымжан Пірәлі, «Үздік қорғаушы» Данияр Сүлейменов, «Үздік сұрмерген» Абай Ерғазы, «Үздік қақпашы» Асхат Әлдиев, «Үздік шабуылшы» номинациясымен Жандияр Қайыржановтар танылды. Жеңімпаздарға аудандық дене шынықтыру және спорт бөлімінің дипломы, демеушілердің кубогы мен медальдары табысталды.
