Қазақстан мен Қытайдың ынтымақтастығына арналған жиын өтті

«Қазақстан мен Қытай өзара ынтымақтастықтың жаңа дәуірінде». Бейжіңде осындай тақырыпта жиын өтті. Онда Қазақстан-Қытай ынтымақтастығының болашағы мен Президент Нұрсұлтан Назарбаевтың 5 әлеуметтік бастамасы талқыланды.
«Жаңа бастамаларды жүзеге асыру жағдайында Қазақстан жақын көршісі әрі серіктесі Қытаймен өзара тиімді, достық қарым-қатынасты бекемдеуге мүдделі», - дейді Қазақстанның Қытайдағы елшісі Шахрат Нұрышев.
Дипломат екі ел арасындағы саяси диалогтың, экономикалық күн тәртібінің жоғары деңгейін атап өтті. «Нұрлы Жол» бағдарламасының «Бір белдеу, бір жол» бастамасымен ұштасып жатқанын да алға тартты. Жиында қытайлық сарапшылар Президент Нұрсұлтан Назарбаевтың Жолдауы мен бес әлеуметтік бастамасын жоғары бағалап, көрші мемлекеттердің маңызды мақсаттары ұқсас екенін атап өтті. Сонымен бірге стратегиялық ынтымақтастықты нығайту бойынша тың ұсыныстар айтылды.
Хан Лу, халықаралық мәселелерді зерттеу институтының сарапшысы:
- Мен Қазақстан Президенті Нұрсұлтан Назарбаев мырзаның 2018 жылғы Жолдауы мен 5 әлеуметтік бастамасын ерекше атап өткім келеді. Ол Қытай Төрағасы Си Цзиньпиннің «Жаңа ерекшеліктегі социализм» атты баяндамасына ұқсас. Қос бағдарлама да елді дамытуға, халықтың өмір сүру деңгейін жақсартуға арналған. Осыған байланысты біз бүгін өзара пікір алмасып, қызу талқы жасадық.