Ауылда жын жүр
Ауыл азаматтары олардың ішіне жын кіріп кеткен деп есептейді. Салдарынан халық үрейленіп, кешке мүмкіндігінше далаға шықпауға тырысады екен. Атырау облысындағы Дамба ауылында түсініксіз жайттар орын алған. Жергілікті тұрғындардың айтуынша, соңғы уақытта екі әйел өзіне қол салып қайтыс болса, тағы екеуі жынданып кеткен екен. Бұл осыдан бірнеше жыл бұрын орын алған оқиға еді.
Сол кездері берген сұқбатта: "Орын алған осынау келеңсіз жайтты болдырмау үшін біз ауылға орталық мешіттен имамдар шақырдық. Облыстың бас имамымен бірге бірнеше дін өкілі келді. Жағдайды түсіндіріп берді. Енді бүкіл ауыл болып садақа бермекпіз", - дейді әкім. Облыстың бас имамы Бауыржан Мансұров та Дамба ауылында жын болуы мүмкін деген фактіні жоққа шығармайды."Дінде - Құран мен хадисте жынның бар екендігі айтылады. Егер періштелер адамға жақсылық алып келсе, жын-шайтандар оларға қарсы жұмыс істейді. Біз Дамба ауылында түсініксіз жайттардың орын алып жатқанын естіп, имамдармен бірге барып келдік. Жергілікті тұрғындарды жинап, жағдайды түсіндіріп айттық. Әдетте, жын-шайтан лас жерге келеді. Сондықтан, адамдардың барлығы үйі мен көшені, ауланы таза ұстауы тиіс", - дейді бас имам.
