НАН ИІСІ
ІІІ Интернационал ауылында заманауи техникамен жабдықталған наубайхана ашылып, ауыл тұрғындарына қызмет көрсете бастады. Жеке кәсіпкер Луиза Тұрсынованың айтуынша, наубайхана жұмысын әлі де ілгерілету керек. Ол көп ұзамай арманының орындалып, ауыл халқының игілігі жолында еселі еңбек ететінін қуанышпен жеткізді. - Бұл біраздан бері ойда жүрген іс еді. Шағын кәсіп ашсам деген арманым болды. Мемлекеттік бағдарлама арқылы құжаттарды әзірлеп, бүгін міне өздеріңіз көріп отырғандай іске кірістік. Қазір мұнда тапсырысқа сай тәулігіне 200 көмеш нан пісіреміз. Сонымен бірге тәтті бәліш, түріктің қырыққабаты мен түрлі кондитерлік өнімге де тапсырыс қабылдаудамыз. Алдағы уақытта тандыр пісіріп сатуды жоспарлап отырмыз, – дейді жеке кәсіпкер.
Луиза "Микробизнес Қызылорда" бағдарламасы аясында несие алып, кәсібін дөңгелентуде. Нан пісіретін пеш, қамыр илейтін құрал-жабдығы замани үлгіде жабдықталған. Енді наубайханада піскен ыстық нан күнделікті ауылдағы бірнеше дүкенге жеткізілетін болады.
Ақнұр САҒЫНТАЙ.
