БІРЛІГІМІЗДІ, ІРІЛІГІМІЗДІ КӨРСЕТТІК
Елдің ертеңіне бей-жай қарай алмайтын ұрпақ өкілі болса ол – ардагерлер. Бұл сайлаудың бұрынғыдан өзгерек өткенін бәріміз көрдік. Оған қарттығына қарамай ардагерлер де өз үлесін қосты. Қазақстан Республикасы Президентін сайлау науқаны – әрбірімізге жауапкершілік жүктегені рас.
Ауданда өткен сайлау да көптің көңілінен шығып, кәмілеттік жасқа толған Қазақстан азаматы қалаған кандидатына өз таңдауын жасады. Жұртшылық таңнан-ақ сайлау учаскесіне ағылып, дауыс берді. Мұнда бірінші мәрте саяси науқанға қатысқан жас та, оған бірнеше мәрте қатысып, ел мүддесіне атсалысқан қартамыс та белсенді рөл атқарды.
Жалпы сайлау әділ өтті. Ешқандай тәртіпсіздік, қандай да бір келеңсіз оқиғалар орын алған жоқ. Мамыражай жағдайда халықтың ауызбірлігін танытқан шара болды бұл. Орталық сайлау комиссиясының қорытындысы бойынша ҚР Президенттігіне кандидат Қасым-Жомарт Кемелұлы көп дауыс басымдығымен жеңіске жетті.
Мемлекет басқару – қашан да оңай болмаған. Жаңадан сайланған Мемлекет басшысының жауапты да аса күрделі қызметіне тек қана табыс тілейміз. Сақа саясаткердің еліміздің болашағы жолында аянбай тер төгіп, еңбек ететініне бек сенеміз.
Қаршыға ЕСДӘУЛЕТОВ,
аудандық ардагерлер кеңесінің төрағасы.
