ОҚУШЫЛАРМЕН КЕЗДЕСТІ
Әкім бол – халқыңа жақын бол. Иә, билік тізгініндегілер де мектеп табалдырығын аттады. Оқушы болды, ұстаздан тәлім алды. Ал әкім болу жолы қандай табандылықты талап етеді? Бұл сауалға жауапты Ш.Уәлиханов атындағы №26 орта мектепте өткен «Адал ұрпақ» ерікті балалар клубының аудан әкімі Сұлтан Ысқақұлымен «Сыбайлас жемқорлыққа қарсы күрес – баршаға ортақ іс» атты еркін форматтағы кездесуінде таптық.
– Мемлекет қажеттінің бәрін жасайды, ал сендер терең білім алыңдар, білікті маман атаныңдар, бастысы Отанды шынайы сүйіп, оған қызмет етіңдер. Ауданда балалар үшін, жастар үшін үлкен істер атқарылуда. Биыл – жастар жылы. Кәсіпті қолға алғанның да дені жастар. Еліміздің мығым болуы – болашақ ұрпақтың қолында. Сендер осыны жете түсініп, артылған сенімді ақтап, жақсы оқып, жақсы азамат, білікті маман болып шығуларың керек. Отанға адал қызмет етулерің қажет. Отанды сүю осылай басталады, – деді аудан әкімі С.Мақашов.
Әрине, өмір болған соң қиындық болмай тұрмайды. Онымен күресе білу керек, жеңе білу керек. Бұл – елағасының басты принципі. Мұнан соң кезек оқушыларға беріліп, олар аудан әкіміне өзін қызықтырған сұрағын қойды. Қош. Балаларға бәрі қызық. Аудан әкімі олардың барлығына да барынша емен-жарқын, барынша ашық жауап берді. Белсенді жастар концерттік бағдарламасынан шашу шашып, ортаны көтеріңкі көңіл-күйге бөледі. Шара соңында оқушылар әкімнің өздеріне ағалық қамқорлығы, жақсы ниеті мен ізгі тілегі, ашық та салиқалы әңімесі үшін алғысын білдірді.
Айнұр ӘЛИ,
«Қармақшы таңы».
