Сауабы мол игі іс
 |  |
Жаратқанның ерекше ықыласы түскен, шарапаты мол, ізгі ниетті іске сауабы көп Рамазан айында ораза ұстаушылардың қатары көбеймесе азайған емес. Әсіресе, мұсылманның парызын орындауға жастар ынталы.
Сондай-ақ, қасиетті айда қайырымдылық танытуға, игілікті шаралар атқаруға ынталылар қатары да арта түсуде. Рамазан айында шамасы келгендердің жыл сайын атқаратын сауабы мол шараларының бірі – ораза ұстап, ауыз бекіткен жандарға ауызашар беру. Бүгінде қасиетті айдың әр кешінде ораза ұстаған жамағат үшін «Ораз ахун» орталық мешіті сауапты ісін жалғастырып келеді.
 |  |
Жұма күні орталық мешітте, 20 жылдық кездесумен №30 мектептің 1999 жылы бітірген түлектері өмірден ерте озған сыныптас достарын еске ала отырып, ас беріп әрі аузы берік мешіт жамағатына ауызашар ұйымдастырды. Түлектердің шынайы ниетімен жайылған дастарханынан ақсақалдар, орта буын өкілдері және имандылықты серік еткен жастар дәм татты.
 |  |
Игі іске үн қосып, сауапты істе жарысқан мектеп түлектеріне «Ораз ахун» мешітінің имамы Нұрболат Рахметуллаев алғысын айтып, бес парыздың бірін орындап, ораза тұтқан жамағатқа «ниет қабыл болып, ізгі амалдарға сауаптан жазсын» деген тілегін білдірді.
Ауызашар соңында Құран оқылып, өмірден ерте кеткен жандардың рухына арнайылап дұға жасалды.
Ерсін СӘДУҰЛЫ,
«Қармақшы таңы».
